金鐘站做超級轉車站?根本設計有疏漏

金鐘站 喺呢個月底會做超級轉車站,港島線、南港島線和荃灣線都喺呢度轉車……轉車設計,適唔適合香港,我好懷疑……

金鐘站 喺呢個月底會做超級轉車站,港島線、南港島線和荃灣線都喺呢度轉車,遲啲仲有東鐵線。呢啲萬佛朝中式轉車設計,適唔適合香港,我好懷疑。至少未必適合 金鐘站 。

要做超級轉車站,除咗要大量空間,應付各線嘅轉車人流外,仲有,如果呢類轉車站,要應付長途旅客,其實入閘後地區一係有商場,提供一定基本服務,一係就係車站出閘外地區,本身係一個巨型商場,甚至兩者皆有,例如東京車站、大阪車站、京都車站之類龐然巨物。

金鐘站 做荃灣線港島線轉車站,其實已經好勉強,放工時間 金鐘站 轉車月台企滿人唔係新聞,南港島線肯定令情況惡化,但最大挑戰係東鐵線,因為東鐵線係跨境鐵路,又係主要郊區通勤鐵路,大家諗吓如果 金鐘站 入閘後區域唔夠大,兼且乜嘢商業服務都無,將會係點嘅情況。

其實 金鐘站 要面對大量通勤旅客,甚至跨國旅客,可能要將海富中心以及樂禮街停車場好似東京站大規模改建,同埋容許轉車區域設立食肆,放寬港鐵逗留喺已付費區域嘅時間限制。因為可以肯定,乘客等n架車,都未必上到車,簡直係東京式通勤惡夢嚟。

黃世澤

何文田站又係官商勾結?

港鐵近年好鍾意興建啲伏味十足嘅車站,西營盤站同香港大學站已經玩人唔駛本,依家何文田站簡直係中伏之霸,愛民邨居民係行餐死至去到「 何文田站 」……

港鐵近年好鍾意興建啲伏味十足嘅車站,西營盤站同香港大學站已經玩人唔駛本,依家何文田站簡直係中伏之霸,愛民邨居民係行餐死至去到「 何文田站 」。

其實用地圖一睇, 何文田站係喺何文田,只不過係紅磡同何文田交界,實際受益係曲街一帶居民。

何文田站
何文田站

真正用到何文田站嘅,其實係曲街、必嘉街、蕪湖街果帶嘅舊樓。咪住?舊樓?咁邊個地產商可以食糊?

根據《大公報》8月31日資料,恆基地產己經申請強拍何文田站附近嘅舊樓,準備大規模發展,大動食指。

點解明明係紅磡北部,又要叫何文田站 ,仲要何文田愛民邨居民走餐死,係咪呢個站嘅命名,以至恆地喺當地收購舊樓嘅策略,又係一個官商勾結,利益輸送嘅事?

拍板決定何文田站果陣,做運房局局長果個叫鄭汝樺,而鄭汝樺依家住緊嘅京士柏山豪宅,係恆基嘅盤,而恆基天匯事件,鄭汝樺同恆基搞緊乜嘢事,大家亦相當心照。命名何文田站 ,但位置又近恆基喺紅磡果堆盤,係咪會令恆基容易賣得高價啲,你話曲街係紅磡,就唔值呢個錢,但你話近何文田站喎就可以claim自己係何文田樓。

所以有人叫政府改站名做老龍坑,呢啲有晒發財大計嘅命名,政府睬你都傻。

黃世澤

古怪嘅西營盤站 :唔能夠俾港鐵玩晒嘅理由

對西營盤站一帶居民嚟講,港鐵出現本來係好事,因為去中環快好多,兩個站就到。只不過,現實係 西營盤站 嘅居民,好多仍然係要依賴巴士特快線同小巴,搭港鐵簡直係中伏體驗。[…]所以,奉勸運吉署,唔好吓吓有地鐵就取消晒啲小巴、巴士服務,如果出現西營盤站 嘅情況,取消晒啲小巴、巴士服務,真係啲居民日日同你返工做運動,叫天不應,叫地不聞,荒謬到爆。

對西營盤站一帶居民嚟講,港鐵出現本來係好事,因為去中環快好多,兩個站就到。只不過,現實係西營盤站嘅居民,好多仍然係要依賴巴士特快線同小巴,搭港鐵簡直係中伏體驗。

大家睇吓西營盤站地圖,就明乜嘢一回事

西營盤站-1-768x889

為咗照顧白痴嘅區議員,貪心嘅地產商,結果西營盤站 嘅位置係in the middle of nowhere,無論你由般含道、奇靈里、第一街定德輔道西入,你都要行五至九分鐘,有啲出入口,你要侷等電梯(般含道),或唔等電梯實中伏(奇靈里),大佬,你要行十幾分鐘至去到地鐵站,我唔坐番巴士或電車算。

所以,奉勸運吉署,唔好吓吓有地鐵就取消晒啲小巴、巴士服務,如果出現西營盤站 嘅情況,取消晒啲小巴、巴士服務,真係啲居民日日同你返工做運動,叫天不應,叫地不聞,荒謬到爆。

黃世澤
(原文刊於黃世澤 Martinoei 網誌)